🌍 هل الهنود بيعبدوا الأبقار؟!!
مغالطة كتير بيقعوا فيها الإجابة قطعا لا. الهندوس بيحترموا البقرة و يبجلوها لانهم بيعتبروها رمز للعطاء و بتعطي اكتر ما بتاخد. عشان كدا بيمنعوا قتلها و عادي تلاقي الابقار بتتنقل بحرية في شوارع الهند بدون ان يمسها أحد. اما عن سبب عدم تناولهم لحوم البقر لان الهندوسية فلسفة نباتية فمبياكلوش لحوم اصلا مش بقر بس!!!وطبعا التراث الهندوسي ملئ بقصص عن عطاء البقرة و منفعتها للإنسان.
الصورة على شاطئ “ارامبول” كنت قاعد مع عادل بنتشمس و طبعا كنت مرعوب في السيلفي دا لان عادل عصبي جدا و متهور وممكن ينطحني في أي لحظة
تابعوني الفترة الجاية هكتب تقارير عن الهند عالهاشتاج دا
#الهند_البلد_الكادحة
#رحالة_مصري
———————————————————-
تعديل ::
طبعا من اللحظة الأولى و أنا متابع التعليقات عن كثب اللي اذهلني فيها عدد المغالطات و العنصرية المرعب لكن انا من عادتي التروي. عشان يكون التعليق شامل كامل! معظم التعليقات كانت تدور في نطاق واحد عشان كدا هلخصها في النقطات التالية:
-الهندوسية لا تعبد البقرة ولكن تبجلها كما اليهود يبجلون حائط المبكي او المسلمين يبجلون الحجر الاسود و بيت المقدس والمثال للتوضيح فقط لا للمقارنة.
-الفلسلفة الهندوسية فلسفة نباتية والهدف منها ان النبات عندما تأخد منه لا يموت ولكن يتجدد اما الحيوان يموت. كون ان في هنود معاك في الخليج بياكلوا لحمة ! دي كأني بقولك في مسلمين صحابي بيشربوا خمرة او سجاير !
-الهند فيها مقاطعات كتير ممنوع فيها دبح الابقار و مقاطعات اخرى مسموح فيها كمقاطعة كيرلا مثلا و اخري تسمح بتداول لحوم الابقار فقط ومفيش حاجة اسمها ممنوع على الاطلاق! امال كل اللحمة اللي كلتها هناك دي كانت ايه
-انا دائما متسامح في التجاوزات في حقي! لكن لا يجوز ان حد يقول هبد و فتي وهو لا يعلم عما يتحدث. لو كلفت نفسك بنص جنيه سيرش على جوجل “كل ربع لوحدة” هتعرف ان كلامي صح do hindus worship cows
-انا مصادري رحلتي للهند و قرأتي الدئوبة عن الفلسفات والأديان والعادات والتقاليد و حواراتي مع رجال الدين و السادو وهم رجال زهدوا الدنيا ويتعبدون فقط. واخيرا رحلتي هناك. اتمنى اني اكون فهمت حاجة!
-المهتم ممكن يراجع نصوص “المهابرتا” واللي تعتبر قصص لطيفة جدا لاساطير الهندوسية مكتوبة بالسنسكريتية تشبه الألياذة و الأوديسة لهوميروس
-ارجو ان تراعوا اننا في جروب سياحي وان في ناس كتير بطلت حرفيا تكتب بسبب تنمركم وانتوا بتخسروهم انا بالنسبالي يا جبل ما يهزك ريح لكن بعض الاخرون بيزعلوا
دمتم مسافرين
ملحوظة: عادل كمان زعلان و قرفان من التعليقات العنصرية!
Follow @BestOfTheWorsti
Best of The Worst AR 